Жалал-Абад шаарында турмуштук оор кырдаалга кабылган балдарды көзөмөлдөө жана аларга жардам берүү күчөтүлмөкчү. Бул тууралуу шаардык мэрияда өткөрүлгөн семинарда айтылды.

Кыргыз Республикасынын өкмөтүнүн “Турмуштун оор кырдаалында турган балдарды жана үй-бүлөлөрдү табуу тартиби жөнүндөгү” токтомунун аткарылышынын негизинде шаардык мэрияда семинар өткөрүлдү. Аталган семинар ”SOS балдар айылы Кыргызстан” эл аралык коомдук уюмунун өкүлдөрү тарабынан уюштурулган. Ага Жалал-Абад шаарындагы мектептердин социалдык педагогдору, аймактык тескөөчүлөр, аймактык башкармалыктардын башчылары катышты.

”SOS балдар айылы Кыргызстан” эл аралык коомдук уюмунун өкүлү Гүлзат Асанбаеванын айтымында, бул уюм бир жылдан бери турмуштун оор кырдаалында жашап жаткан үй-бүлөдөгү балдарды көзөмөлдөп, ошол үй-бүлөлөргө жардам берип, иш алып барып келишет.

“Жалал-Абад шаардык мэриясынан социалдык өнүгүү бөлүмүнүн жетектөөчү адиси Салтанат Алтынбекова биздин тренингге катышып келген. Биз бүгүн Жалал-Абадда балдарга байланышкан кандай көйгөйлүү маселелер бар экендигин билгени келдик. Бүгүнкү семинарга келип катышкандардын ар бири өз коллективдерине, шаар тургундарына кеңири түшүнүк берет деген ойдобуз”,- дейт Г. Асанбаева.