Жалал-Абад шаарында чакан жана орто бизнести өнүктүрүү жана анын мүмкүндүктөрүн социалдык-экономикалык маселелерди чечүүгө пайдалануу жагынан алга жылыштар байкалууда. Бул тууралуу шаар мэриясынын аймактык экономикалык өнүгүү бөлүмүнүн башчысы Салижан Умаров билдирди.

Анын айтымында, шаардагы кичи жана орто бизнес ишканалары, жеке ишкерлер тарабынан реалдуу экономиканын өсүшүнө чоң салымдарын кошушууда. Бул ишканалар жана жеке ишкерлер тарабынан жылдын биринчи жарымында 138,7 миллион сомдук продукция өндүрүлүп, ал шаарда жалпы өндүрүлгөн продукциянын жалпы көлөмүнүн 7,9 пайызына туура келди жана өсүү темпи өткөн жылга карата 109,6 пайызды түздү.

- Жыл сайын ишкерлер тарабынан чакан бизнес чөйрөсү алдыга кетип жатат. Жаңы ишканалар түзүлүүдө, жумушчу орундары ачылууда. Акыры келип эле чакан жана орто бизнестин шаардын реалдуу экономикасындагы үлүшү өсүп баратат. Шаар мэри жакын арада шаардагы ишкерлер менен шаар бийликтеринин ортосундагы жемиштүү диалогду түзүү демилгеси менен чыкты. Бул, албетте, ишкерлердин дагы да өнүгүшүнө шарт түзөт, - дейт С. Умаров.