Кечээ, 19-июль күнү, “Бишкек-Ош автоунаа жолун реконструкциялоо, V-фаза, «Маданият-Жалал-Абад жолу” долбоору боюнча кеңешме болуп өттү.

Кеңешмеге Өкмөттүн Жалал-Абад облусундагы ыйгарым укуктуу өкүлү Кыянбек Сатыбалдиев, КР Транспорт жана жолдор министрлигинин алдындагы инвестициялык долбоорлорду ишке ашыруу тобунун директору Руслан Сатыбалдиев, “Renardet Consulting Engineers” компаниясынын долбоор жетекчиси Харун Ур Рашид, “AzVirt” жоопкерчилиги чектелген коомунун долбоор менеджери Кудрет Тунсипер, транспорт жана жолдор министрлигинин аймактык координатору Акжолбек Бегалиев, ошондой эле Ноокен, Базар-Коргон, Сузак райондорунун администрация башчылары-акимдер, тийиштүү мекеме-ишканалардын, айыл өкмөттөрдүн башчылары катышышты.

Облус жетекчиси өз сөзүндө: "Көптөн бери чечилбей келе жаткан көйгөйлүү жолдун башталышын мамлекет башчыбыз Жээнбеков Сооронбай Шарипович өз көзөмөлүнө алып, "2018-жыл Аймактарды өнүктүрүү" жылына карата башталып жаткан долбоор калкыбыз үчүн жакшы шарттарды жаратат. Анткени жол менен бирге эле район, шаар, айыл өкмөттөрдүн борборлоруна тротуарлар кошо салынып, жарыктандыруу иштери да жүргүзүлөт"-деп билдирди.

Ошондой эле, өкүл жумуштун жүрүшүндө жаралган жалпы көйгөйлөрдү көтөрүп, жумуштун ырааттуу жана кемчиликсиз жүрүшүн камсыздоону белгиледи. Мындан сырткары райондун акимдерине жол куруудагы техникалык маселелерди эске алып, долбоорду аткаруучулар менен тыгыз иш алып барууну милдеттендирди.

Эскерте кетсек, аталган жолдун узундугу 67 км, туурасы 2 тилкеден 3,5-3,75 метрди түзүп, жалпы сметалык баасы-72 млн. АКШ долларына бааланган.

Өкмөттүн Жалал-Абад облусундагы ыйгарым укуктуу өкүлдүн басма сөз кызматы.