Жалал-Абад ОИИБгы, УКМК жана облустук казыят менен биргеликте, 11-июнь күнү  Жалал-Абад облусунун аймагында диний экстремизм жана терроризмдин алдын алуу максатында алынган ыкчам маалыматтардын жана соттун токтомунун негизинде, Ноокен РИИБнүн 10-тобунун каттоосунда турган, “Хизбут-Тахрир” диний экстремисттик уюмунун активдүү мүчөлөрү жана үгүтчүлөрүнүн жашаган 3 үйдүн даректерине калыстардын катышуусунда таң аткан убакта эрте менен тинтүү жүргүзүлдү.

Жалал-Абад ОИИБнын басма сөз кызматынын берген маалыматына караганда, операция учурунда “Хизбут-Тахрир” динний экстремисттик уюмуна  тиешелүүлүгүнө шектүү болгон гезиттер жана ДВД дисктер далил буюм катары алынып, чогултулган материалдар Ноокен РИИБнүн тергөө бөлүмүнө өткөрүлүп берилип, соттук-теологиялык экспертиза дайындалып, тергөө амалдары жүргүзүлүүдө.

Ошондой эле, Ноокен районунун Достук айылынын тургундары буга чейин аялы каттодо турган ал эми өзү (38 жашта) соттолгон дагы бир атуул үй-бүлөсү менен (жолдошу жана аялы) жергиликтүү айылдагы мечитте айыл аксакалдарынын алдында аталган уюмдан чыккандыгын билдирди.

Акыркы убакта Жалал-Абад облусунда түшүндүрүү иштеринин натыйжасында бул мыйзамсыз уюмдун мүчөлүгүнөн өз ыктыяры менен чыккандардын саны арбып барат. Ноокен районунда да буга чейин 3 жаран өз эрки менен экстремисттик уюмдан чыгышкан.

Өткөн жыл ичинде Жалал-Абад облусунун аймагында 7 адам бул мыйзамсыз уюмдан өз эрки менен чыкса, быйылкы жылдын  жыл башынан бери 6 ай ичинде 12 атуул адашып калгандыгын сезип, кайрадан туура жолго салттуу ислам динине кайткандыгын мойнуна алып массалык маалымат каражаттары аркылуу ачык айтып, Хизбут-Тахрир экстремисттик уюмунан чыгууда.