Куралдуу күчтөрдүн Башкы штабы Ысык-Көл облусунун Түштүк Эңилчек мөнгүсү тарапта “Ми-8 МТВ” үлгүсүндөгү аскердик тик учактын кулап түшүүсү боюнча айрым маалыматтарга тактоо киргизди.

Башкы штаб билдиргендей, аскер тик учагы тоодогу туристтик компанияларга азык-түлүк жана медициналык каражаттарды жеткирүү үчүн барган.

«Өкмөттүн токтому боюнча мындай авиациялык иштерди аткарууга уруксат берилет. Кишилер жардамга муктаж деген фирмалар бизге кайрылышат. Биз азык-түлүк жана медикаменттерди жеткиргенбиз», — деп айтылат штаб тараткан билдирүүдө.

Буга чейин тик учак альпинисттерди куткарыш үчүн барганда кырсыкка кабылганы айтылган. Алдын ала маалыматтар боюнча ал катуу шамалдан улам бир капталы менен кулаган. Кырсыктын айынан төрт киши жаракат алган, курмандыктар жок. Бортто 15 киши болгон.

Андан кийин Ысык-Көлдөгү тик учак кулаган жерге дагы бир тик учак жөнөтүлүп, Бишкекке алты кишини, анын ичинде жабырлануучуларды алып келген.

Бул окуя боюнча тергөө органдары иш алып барып жатканын айткан Башкы штаб кырсыктаган тик учактын абалы тууралуу маалымат берген жок. Мекеме учууга жарамдуу тик учактардын санын атоодон дагы баш тартты.

Түштүк Эңилчек мөңгүсү - Борбордук Теңир-Тоодогу өрөөн тибиндеги мөңгү. Кан-Теңир тоо тоомунда жайгашкан, Теңир-Тоодогу эң чоң мөңгү болуп эсептелет.