Бүгүн, 14-июнь - Бүткүл дүйнөлүк донорлор күнү. Ага карата КР Улуттук “Кызыл Ай” коомунун Жалал-Абад облусундагы өкүлчүлүгү тарабынан шаардагы медициналык колледжинде ыктыярдуу донорлор сыйланды.

Жалал-Абад шаардык мэриясынын басма сөз кызматынын берген маалыматына караганда, 2017-жылдан тарта КР Улуттук “Кызыл Ай” коомунун облустагы өкүлчүлүгү Жалал-Абаддагы облустук Кан борбору менен биргеликте ыктыярдуу донорлордун санын көбөйтүү аракеттерин көрүп келе жатышат.

Соңку жылдарда өлкөдөгү донорлор саны кыскарганы менен КР Улуттук “Кызыл Ай” коомунун тактаган маалымат боюнча, Жалал-Абад облусу өлкөдө алдыда бара жатат. Ошого карабастан оорулуулардын ден- соолугун, өмүрүн сактап калуу үчүн канга болгон муктаждык күн санап өсүүдө.

Эскерте кетсек, Жалал-Абад облустук Кан борборундагы 50 кызматкер облус аймагындагы медициналык мекемелерди кан менен камсыздап келет. Облус аймагында төрт жарым миң ыктыярдуу донорлор болсо, алардан 85и 30 жолудан ашуун кан тапшырган Ардактуу донорлор болуп эсептелет. Азыркы тапта Кан борбору жылына эки жарым миң литр кан даярдап келет.