«Азаттыктын» түркмөн кызматынын кабарчысы Сапармамед Непескулиев үч жылдык жазасын өтөп бүтүп, эркиндикке чыкты.

Маалыматка караганда, Непескулиев 19-майда боштулган. Булактар маалымдагандай, журналисттин ден соолугунда олуттуу көйгөйлөр бар.

Непескулиев 2015-жылдын июлунда камакка алынып, Түркмөнстанда тыюу салынган трамадол медициналык каражатын сактаган деген айып менен соттолгон. Эл аралык укук коргоо уюмдары бул айыптоону жасалма деп аташып, түркмөн бийлигин журналистти эркиндикке чыгарууга үндөп келишкен.

Камалганга чейин Непескулиев Түркмөнстан бийлигин сындаган репортаждарды даярдап жүрчү. «Чек арасыз кабарчылар» уюмунун версиясы боюнча, бул өлкө сөз эркиндигинин рейтингинде 180 өлкөнүн ичинен 178-орунда турат. Түркмөнстанда «Эркин Европа/Азаттык» радиосунун башка журналисттери дагы куугунтуктоолорго кабылып келишет.