Тажикстан Улуттук коопсуздук комитети террордук жана экстремисттик уюмдар Зелло интернет-рациясы аркылуу өлкө жарандарын катарына тартып жатканын билдирди.

«Акыркы жылдары Тажикстан Кайра жаралуу партиясы жана «Группа 24» экстремисттик тобу пропаганда жана үгүт жүргүзүү, тажик жаштарын “Ислам мамлекети” экстремисттик тобунун катарына тартуу үчүн тажик калкына каршы багытталган антиконституциялык ишмердүүлүгүн Зеро тиркемесин колдонуу аркылуу ишке ашырууда» деп эсептейт тажик атайын кызматы.

Тажикстан Улуттук коопсуздук комитети бул боюнча он минуттук даректүү тасма даярдап, 21-май күнү тажик каналдары аркылуу көрсөттү.

Тасмада терроризм үчүн соттолгон айрым жарандардын маегине орун берилген. Алар террордук топтордун катарына оппозиционерлердин чакырыгы менен Зелло интернет-рациясы аркылуу кошулушканын моюндарына алышкан.

Даректүү тасма ондогон киши Ирандын Душанбедеги элчилигинин алдына чогулуп, бул өлкөгө жана диний партияга каршы акция өткөргөн күнү көрсөтүлдү. Алар Иран өлкөдө тыюу салынган Тажикстан Кайра жаралуу партиясын колдойт деп эсептешет.

Ислам партиясы менен «Группа 24» өкүлдөрү Тажикстан атайын кызматынын билдирүүсүнө жооп кайтара элек. 2015-жылы Тажикстан ИИМи өлкөдө тыюу салынган сайттардын тизмесин жарыялаган, алардын катарына Zello радиосу (http://zello.com) да киргизилген.