КР Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев үстүбүздөгү жылдын 16-май күнү иш сапары менен Аксы районуна барып, 14-май күнү табият кырсыгы болуп, сел жүргөн аймактарды жеринен көрдү. 

Иш-сапардын алкагында өкүл Сатыбалдиев Аксы районундагы Ак-Суу айыл аймагынын жашоочулары менен жолугушуп, тургундардын көйгөйлөрүн укту. Жергиликтүү жашоочулар жол, мектеп, бала-бакча, саламаттыкты сактоо тармагы, жөлөк пул ж.б. маселерди көтөрүп, тийиштүү жетекчилерге тапшырма берилди. Ошондой эле, Ак-Суу айыл аймагындагы №12-К.Шеркулов орто мектебинин абалы менен таанышып, санитардык-гигиеналык талаптарга жооп бербеген, окуу бөлмөлөрү тар шартта иштеп жаткан мугалимдерге ыраазычылык билдирүү менен, жаңы мектептин курулушун баштоону колго ала тургандыгын билдирди.

Өкүл Кыянбек Сатыбалдиев Аксыга болгон иш сапарында 14-май күнү тарбият кырсыгы болуп, сел жүргөн аймактарды жеринен көрдү. Семет айылындагы селдин агымынан жарака кетип, урай баштаган көпүрөнү тез арада калыбына келтирүү жагын колго алууну, Мундуз айылындагы суу түшкөн каналдын жээктерин бекемдөө жана жолдорду атайын техникалардын жардамы менен тегиздөө иштерин ыкчам улантууну тапшырма берди. Ал эми Кош-Дөбө айыл аймагындагы сел түшүүчү каналдардын абалы менен таанышып, табият кырсыгынан жапа чеккен тургундар менен жолугушту.

Андан кийин, ыйгарым укуктуу өкүл Аксы районуна болгон иш сапарынын алкагында  Кербен шаарынын активи менен жолугушту. Жыйынга райондогу мекеме-ишканалардын жетекчилери, аксакалдар, аялдар жана жаштар кеңештеринин өкүлдөрү катышышты. Өкүл өз сөзүндө жаралган көйгөйлөрдү ыкчам чечүүнү, социалдык-экономикалык көрсөткүчтөрдү жогорулатууну жана 2018-жыл "Аймактарды өнүктүрүү" жылынын алкагында элет жерлерине өзгөчө көңүл буруп, эл менен тыгыз иштешүү керек экендигин баса белгиледи.

Жыйындан соң, 7,4 км чакырым узундуктагы Ак-Терек каналынын курулуш иштери жана каналдын 2044 метри өтүүчү тоннелди көрдү. Белгилей кетсек, сыйымдуулугу 9,2 м кв/секундду түзгөн каналды 2023-жылга бүтүрүү пландаштырылган.