Кечээ, 8-июнда Ош шаарынын мэри Айтмамат Кадырбаев 17-20 ноябрь Ош шаарында күчү 6  баллга жеткен жер титирөөдөн жабыр тарткан, IV-даражадагы 34 жеке турак жай ээлерине акчалай жардамды тапшырды. Бул тууралуу мэриянын басма сөз кызматы билдирди.

Алынган маалыматка караганда, бүгүнкү күндө, шаарда жер титирөөдөн жабыр тарткан жарандарга жакындан жардам катары чет мамлекеттерден, министрликтерден, ведомостволордон, мекемелерден, ишканалардан, коомдук бирикмелерден жана жеке ишкерлерден акча каражаты келип түшкөн. Кыргыз Республикасынын Өкмөтүнүн буйругунун негизинде, Ош шаарынын мэриясынын атайын эсебине 3 млн. 816  миң 739 сом акча каржаты бөлүнгөн.

Шаар башчысы Айтмамат Кадырбаев табият кырсыктары кайталанбасын деген тилегин билдирип, зилзаладан жабыр тарткан жарандарга мамлекет тарабынан колдоо болуп тураарын билдирди.

- Зилзалада эн негизгиси адам өмүрү кыйылган жок. Ал эми келип түшкөн акча каржатын IV-даражадагы жабыр тарткан 34 жарандын ар бирине 112 миң 257 сомдон бөлүп берип жатабыз. Бул мамлекет башчысынын жана өкмөттүн жеке тапшырмасы. Кырсык айтып келбейт экен. Элдин ынтымагы, биримдиги, мекенчилдиги ушундай учурларда билинээрин сезип олтурабыз”, - деди А. Кадырбаев.

Жыйындын жүрүшүндө Ош шаарынын мэри Айтмамат Кадырбаев бөлүнүп жаткан акча каражатын жеке көзөмөлгө алып, ар бир жабырлануучуга өз колу менен талондорун тапшырды. Алар Ош шаарынын мэриясынан бөлүнгөн жардамдарын алышты.

Белгилей кетсек, 2015-жылдын 18-ноябрынан 2016 - жылдын 16-февралына чейин шаар аймагындагы жабыркаган жарандардын арыздарынын негизинде 265 социалдык объекттер  жана жеке турак-жайлар  жеринде иликтенип жыйынтыгында III-даражада 55 жана IV-даражада  34 жеке турак-жай кооптуу деп табылган.