Жалал-Абад шаарында Улуу Жеңиштин 73 жылдыгына арналган “Мен атамды жана агаларымды эскерем” аттуу веложүрүш болуп өттү. Бул тууралуу шаар мэриясынан билдиришти.

Бул эскерүү иш-чарасы шаардагы этникалык татарлар коому тарабынан сунуш кылынып, шаар мэриясы жана коомчулугу тарабынан колдоого алынган. Шаар жетекчилиги атайын буйрук менен веложүрүштү уюштуруу жана өткөрүү боюнча иш-чараларынын планын бекиткен.

-Бүгүн шаардагы бардык мекеме-ишканалардын, окуу жайларынын, коомдук бирикмелердин жамааттары бир кишидей велосипеддер менен шаар четинен борбордук “Жеңиш” эс алуу багына чейин жүрүш жасашты. Ал эми эс алуу багында “Мен атамды жана агаларымды эскерем” аттуу эскерме-сүрөт көргөзмөсү уюштурулуп, ар бир жаран согуштан кайтпай калган аталарынын, абаларынын ысымдарын жазышты, сүрөттөрүн илишти. Бул иш-чарага айрыкча жаштардын көбүрөөк катышканы бизди кубандырды, анткени аларда кечээки улуу трагедия, Улуу Жеңиш үчүн канын-жанын берген аталардын эрдиги тууралуу кененирээк билишти деп ойлойбуз, - дейт шаардын вице-мэри Руслан Алтымышов.

Шаардык маданият сарайынын күчү менен атайын программадагы концерт, сахналык көрүнүштөр уюштурулуп, иш-чаранын аягында согуштан катпай калган, тынчтык күндөрүндө көзү өтүп кеткен маркумдарга арналып Куран окулду.

Эскерте кетсек, Улуу Ата Мекендик согушка Жалал-Абад шаарынан 10 миңден ашуун жоокер аттанган, алардын дээрлик жарымы өз жерине кайтып келген эмес. Жалал-Абаддыктардан 5 жоокер согуштагы кайталангыс эрдиги үчүн Советтер Союзунун Баатыры наамына татыктуу болушкан.  Ал эми азыр согуштун 15 ардагери калды.