Киевдин соту мурдагы грузин президенти, Украинадагы "Жаңы күчтөр кыймылынын" лидери Михаил Саакашвилинин саясий башпаанек берүү тууралуу өтүнүчүн четке какты.

Анын адвокаттарынын айтымында, эми Саакашвилини Грузияга экстрадициялоого жол ачылышы мүмкүн. Алар Киев сотунун дүйшөмбүдөгү өкүмүн жокко чыгаруу талабы менен Конституциялык сотко арызданышарын билдиришти.

Былтыр июль айында Украинанын президенти Петро Порошенко Саакашвилини украин жарандыгынан ажыраткан. "Буга Одесса облусунун мурдагы губернаторунун 2015-жылы жарандык алыш үчүн жалган маалыматтарды көрсөткөнү себеп болду" деп кабарланган. Сентябрь айында Саакашвили Украинанын Миграция кызматына кайрылып, качкын макамын берүүнү өтүнгөн.

Январь айынын башында Тбилисинин соту Саакашвилиге биринчи жолу өкүм чыгарып, аны 12 жыл мурда грузин банкиринин өлүмүнө байланыштуу үч жылга сыртынан абакка кескен. Саакашвили Украина менен Грузиянын бийлиги аны куугунтуктап жатканын айтып жүрөт.

Саакашвилинин баш коргоо чарасынын мөөнөтү аяктады

6-февралга оогон түнү Грузиянын мурдагы президенти жана «Жаңы күчтөр кыймылынын» лидери Михаил Саакашвилинин түнкү үй камагы менен Киевден чыкпоо боюнча баш коргоо чарасынын мөөнөтү аяктады.

Буга чейин айыптоо тарап Саакашвилинин ишкер Сергей Курченкодон акча алгандыгы боюнча ишке байланыштуу ага күнү-түнү үй камагына алуу баш коргоо чарасын белгилөөнү жана электрондук билерик тагууну өтүнгөн.

Адвокат Руслан Чорнолуцкий саясатчынын баш коргоо чарасынын мөөнөтү аяктагандан кийин ага карата эч кандай чектөө жок экенин, болгону чакыруу боюнча шектүү катары тергөө иш-чараларына катышууга милдеттүү болорун билдирди.

Анын айтымында, бийликтин Саакашвилинин баш коргоо чарасынын мөөнөтүн узартпоо чечими — аны Украинадан мажбурлап чыгарууга же Грузияга экстрадициялоого болгон даярдык болушу мүмкүн.