Өткөн айда Нью-Йоркто чакан жүк ташуучу унаа менен көчөдөгү адамдарды тебелетип кеткен өзбекстандык иммигрант Сайфулло Саиповго 22 пункт боюнча айып тагылды, алардын арасында киши өлтүрүү жана “Ислам мамлекети” экстермисттик тобун колдоо кинелери дагы бар.

29 жаштагы Сайфулло Саипов сегиз кишини өлтүрүүгө жана 12 кишини өлтүрүүгө аракет жасоого айыпталууда. Эгер ал күнөөлүү деп табылса, өлүм жазасына тартылышы ыктымал.

21-октябрда АКШнын Нью-Йорк шаарынын Төмөнкү Манхэттен аймагында жүк ташуучу автоунаа велосипед тебүүчүлөрдүн атайын жолуна качырып кирип барып, бир нече кишини тебелеп кеткен. Бул жерде мурда Дүйнөлүк соода борборунун кош мунарасы жайгашкан.

Бул окуя 2001-жылдын 11-сентябрынан кийинки эле Нью-Йорктогу эң кандуу чабуул болуп калды. Саипов кармалары менен эле терроризм боюнча күнөөлөнгөн. Бирок башка айыптарды тагуу үчүн далилдерди топтоого прокурорлор бир нече апта коротушкан. Саиповдун адвокаты айыптоочу чечим боюнча комментарий бере элек. Саиповдун соту 28-ноябрда өтөт. Анда ал билдирүү жасайт деп күтүлүүдө.

Сайфулла Саипов Ташкентте туулуп-өскөн, 2010-жылы лотереяда грин-карт утуп алып, АКШга келген. Алгач Флоридада, андан соң Огайодо жана акыркы убактарда Нью-Жерсинин Паттерсон шаарында жашаган. Саиповдун тааныштары аны каржы көйгөйлөрү бар агрессивдүү жигит катары сыпатташкан, бирок радикал экени байкалган эмес.