Россиянын Сочи шаарында 11-12-ноябрь күндөрү өткөн күжүрмөн самбо боюнча Дүйнөлүк чемпионатында КР ИИМдин Атайын багыттагы “Шумкар” полкунун Жалал-Абад шаарындагы өзүнчө ротасынын кызматкери Улан Абдиманап уулу 3-орунга ээ болуп, коло медал тагынды.

Жалал-Абад ОИИБнын басма сөз кызматынын берген маалыматына караганда, өткөн жума соңунда дүйнө чемпионатынын жеңүүчүсүн Жалал-Абад ОИИБнын жетекчилиги, жергилкитүү депутаттар, мектеп окуучулары, студенттер жана кесиптештери ак калпак, чепкен кийгизип тосуп алышты.

Чемпионатка өлкөбүздөн 17 спортчу (15 эркек, 2 аял) катышып анын ичинен Абдиманап уулу Улан 100 килограммдан жогорку салмактагылар арасында жеңишке жетишкен.

 “Буга чейин Ташкентте өткөн Азия чемпионатында 1-орунду алгамын. Бул жолку беттеште алгач Бразилиянын, кийин Кореянын спортсмени менен беттештим. Алтын байгени алам деген ниеттерим бар болчу, насип экен 3-орунду алып калдым. Бирок, шүгүрчүлүк келтирем. Баса белгилеп кетчү нерсе мага колдоо көрсөтүп, шарт түзүп берген ИИМдин, ОИИБнын жетекчилигине, машыктыруучуларыма учурдан пайдаланып ыраазычылык билдирип кетем. Мага болгон ишеничтерин кийинки мелдештерде да актоого бүт аракетимди жасайм”, - деди Улан Абдиманап уулу.