Майлуу-Суу шаарынын Майлуу-Суу дарыясында шаардын Левобережная көчөсүн байланыштырган жөө адамдар өтүүчү көпүрө сапаттуу капиталдык ремонттон чыгарылды. Бул туурасында ыйгарым укуктуу өкүлдүн басма сөз катчысы билдирди.

Буга чейин авариялык абалга келип калган көпүрөнү капиталдык ремонттон чыгартып берүү өтүнүчү менен Майлуу-Суу шаарынын жашоочулары Кыргыз Республикасынын Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиевге атайын кат жолдошкон болчу. Ыйгарым укуктуу өкүл Кыянбек Сатыбалдиев өзүнүн резервдик фондунан көпүрөнү капиталдык ремонттон чыгартууга 150 миң сом ажыратып берген. Ал эми Майлуу-Суу шаарынын мэриясын көпүрөнү оңдоого 800 кг. арматура бөлүп берген.

Сапаттуу капиталдык ремонттон чыгарылган көпүрөнүн ачылыш аземине ыйгарым укуктуу өкүл Кыянбек Сатыбалдиев, өкүлдүн биринчи орун басары Мамасалы Акматов, Майлуу-Суу шаарынын мэри Нурадил Маматов жана Майлуу-Суу шаарынын тургундары катышты. Учурда Майлуу-Суу дарыясындагы Левобережная көчөсүндөгү узундугу 30 метр, туурасы 1,9 метр келген көпүрө сапаттуу капиалдык ремонттон чыгарылып, шаар калкынын кызматында иштеп жатат.

Жолдошбай Осмонов, Жалал-Абад облусу