Өзбекстандын Самарканд облусунун Пастдаргам районунда белгисиз кишилер аймактагы белгилүү валюта ишкери Абдулла Арифжановго бычак менен кол салышты.

Укук коргоо органдарында иштеген кызматкердин айтымында, Абдулла Арифжановго ири суммадагы акчасын тартып алуу үчүн кол салышкан. Ишкер оор абалда ооруканага жеткирилген.

– Алар бычак менен кол салышып, бир нече миң долларын уурдашып, өзүн алма бакчасына таштап кетишкен. Учурда тергөө жүрүүдө. Кылмышкерлер изделдүүдө, – деди ал.

Маалыматтарга караганда, Абдулла Арифжанов Пастдаргам районундагы эң бай адамдардын катарына кирет. Ишкер бир нече дүкөндөргө ээ жана чет элдик валюталарды алып-сатуу менен алектенет.

Өзбекстанда валюта жана алтын менен иштеген ишкерлерге бычак менен кол салуу учурлары арбын.