Жалал-Абад шаарынын ишкерлеринин арасында заманбап электрондук-санарип кол тамгасын колдонуу жөнүндө маалымдуулугун жогорулатуу максатында шаардагы “Бишкек” ресторанында ишкерлердин катышуусу менен тегерек стол уюштурулду. Анда электрондук кол тамгасы деген эмне, аны кандай колдонсо болот, азыркы учурда кимдер колдонуп жатат жана анын келечеги кандай деген маселелердин айланасында талкуу жүрдү.

“Интербилим” борборунун мүчөсү Чынара Ирисованын айтымында, Кыргызстанга санариптик кол тамга менен иш алып баруу 2004-жылы эле келген, бирок иш алып баруунун бул багыты өлкө боюнча өндүрүш тармагындагы ишкерлер арасында кеңири тараган эмес. Азыркы учурда Бишкек, Ош облустарынын бир катар ишкерлери мындан пайдаланып келе жатышат. Электрондук-санарип кол тамгасын колдонуунун оптималдуулугу чакан жана орто бизнес үчүн электрондук форматта мамлекеттик кызмат көрсөтүүлөрдүн жеткиликтүүлүгүн жогорулатып, убакытты үнөмдөйт.

“Андан тышкары, Бажы биримдигине кошулган Кыргызстандык ишкерлер чет өлкөлүк компаниялар менен келишимдерди түзүүдө жана иш алып барышууда бир топ жеңилдиктерди жаратат. Алар чет өлкөгө чыкпай туруп, электрондук кол тамга жардамында келишим түзүүнү ишке ашырса, - дейт Ч. Ирисова.

Бул уюштурулган тегерек стол жарандык коомдун жана менчик сектордун өнөктөштүгүн чыңдоого багытталган жана АКШнын эл аралык өнүгүү боюнча агенттиги (USAID), Улуу Британиянын Эл аралык өнүгүү министрлиги (DFID) тарабынан каржыланган, ошондой эле Ист-Вест Менежмент Институту (EWMI) тарабынан ишке ашырылып жатат.