Кыргыз өкмөтү чек арадагы кырдаалдан жапа чеккен ишкерлерди колдоону чечти. Өкмөттүн басма сөз кызматы билдиргендей, премьер-министр Сапар Исаков кыргыз-казак чек арасындагы абалды талкуулаган жумушчу жыйын өткөрүп, тиешелүү токтомго кол койду. Анда сөз сүйлөгөн учурда Исаков чек арада жабыркагандардын басымдуу бөлүгү Казакстандын ишкерлери экени аныкталганын билдирди.

Маалыматка караганда, казак тарап менен чек арадагы абалды жөнгө салуу багытында биргеликте иштелип чыккан «жол картага» белгисиз себептерден улам азыркыга чейин кол коюла элек.

Исаков президент маселени чечүү боюнча бир катар тапшырмаларды бергенин, ага ылайык чыгымга учураган товар өндүрүүчүлөргө, оор жүк ташуучуларга жана ишкерлерге колдоо көрсөтүү үчүн токтом даярдалганын белгиледи. Мындан тышкары кандай гана кырдаал түзүлбөсүн Кыргызстан менен Казакстандын эли боордош эл катары калат деп кошумчалады.

Экономика министри Артем Новиков жыйында билдиргендей, чек арада турган 349 айдоочуга сурамжылоо жүргүзүлүп, алардын бир күндүк чыгымдары эсептелип чыккан. Анын айтымында, бир оор жүк ташуучу автоунаа кезеги жетип чек арадан өткөнчө 5-6 күн өтөт.

Ал эми Чек ара кызматынын төрагасы Уларбек Шаршеевдин маалыматына караганда, ушу тапта кыргыз-казак чегиндеги «Ак-Тилек» көзөмөл-өткөрүү пунктунда 460, «Чоң-Капкада» 90, Чалдыбарда 16 оор жүк ташуучу машине кезек күтүп турат.