Баткен окуясынын 17 жылдыгына карата Жалал-Абад шаарынын “Жеңиш” эс алуу багында каза болгондорду эскерүү иш-чарасы болуп өттү. Бул иш-чарага шаар бийлигинин, ишкана-мекемелердин жетекчилери, коомчулук өкүлдөрү катышышты.

Иш-чара учурунда окуяда курман болгондорго куран окулуп, эстеликке гүл чамбарлар коюлду. Расмий иш-чарадан соң, баткенчилерге сый-тамак жана концерттик программалар шаардагы “Салкын” эс алуу жайында уюштурулду. Ал эми иш-чарага жергиликтүү бюджеттен 85 миң акча каражаты каралган.

Сабихилла Султанов 43 жашында Баткен окуясына катышкан. Анын айтымында, жыл сайын ушул күндү майрам катары белгилеп, курман болгондорго куран окушат.

- Баткен окуясына 17 жыл болсо да, жылда Жалал-Абад шаарынын жергиликтүү бийлиги чакырып, бизге сый көрсөтүшөт. Бул үчүн шаар бийлигине ыраазычылык билдиребиз, - дейт ал.

Ал эми Жалал-Абад шаарынын вице-мэри Айзат Раматиллаеванын айтымында, Баткен окуясынын катышуучуларына шаардык мэрия тарабынан сый-тамактар, урмат көрсөтүү чаралары уюштурулган.

- Алардын бир күн болсо да маанайын көтөрүү максатында концерттик програмалар уюштурулду. Ал эми каза болгондордун үй-бүлө мүлөрүнө акчалай жардамдар тапшырылды. Эми  Баткен окуясынын катышуучуларынын балдарына да жеңилдиктер каралып жатат жана эс алууларына кеңири мүмкүнчүлүктөр түзүлө берет, - дейт А. Раматиллаева.

Эскерте кетсек, Баткен окуясына Жалал-Абад облусунан 1200 атуул катышкан. Алардын ичинен миңи арабызда. Жалал-Абад шаарынын аймагында 95и бар. Алар жылына 500 сомдон жөлөк пул алышат, бир жылда 2 миң сомдон жардам берилет.Баткенчилердин балдары мектептердеги ата-энелер фондусуна, балдар бакчаларга төлөмдөрдөн бошотулган. Жайкы эс алуу лагерлерине балдары акысыз барышат.