Чыныбай Турсунбековдун ордуна Дастан Жумабеков Жогорку Кеңештин төрагасы болуп шайланды. Чыныбай Турсунбеков cпикерликтен кетип жатканын бүгүн эртең менен парламенттин жыйынында жарыялаган.

Жогорку Кеңештеги "Кыргызстан" фракциясынан депутат Дастан Жумабеков парламент спикери болуп шайланды. Аны 80 депутат колдоду. Дагы бир талапкер, "Өнүгүү-Прогресс" фракциясынан депутат Исхак Масалиевге 32 киши добуш берди. Беш депутат эки талапкерге тең "каршы" болушту.

Жогорку Кеңешке жаңы спикер болуп шайланган Дастан Жумабеков парламенттеги бардык фракцияларга тегиз кароого убада берди:

- Мен мамлекет үчүн, Кыргызстан эли үчүн таза иштеп бергенге, баарыңарга, бардык фракцияларга тегиз кароого сөз берем.

41 жаштагы Дастан Жумабеков 1976-жылы 2-ноябрда Талас облусундагы Кара-Буура районунун Саткей айылында туулган. 2001-жылы Кыргыз Улуттук университетин “юриспруденция” адистиги боюнча аяктаган. 2010-жылы «Ата-Журт» партиясынан V чакырылыштагы депутаты болуп шайланган, ал эми 2015-жылы «Кыргызстан» партиясынын катарында VI чакырылышка депутат болуп келген.

Дастан Жумабеков Бишкек шаардык Травматология жана ортопедия улуттук борборунун жетекчиси, атактуу травматолог Сабырбек Жумабековдун бир тууган иниси.

"Азаттык" үналгысы