Жалал-Абад шаардык мэриясында социалдык коргоо жана профсоюз уюмунун кызматкерлеринин  күнү белгиленди. Шаар мэриясында өткөрүлгөн майрамдык иш-чарага шаардын социалдык маселелер боюнча вице-мэри Айзат Раматиллаева,  шаардын социалдык коргоо башкармалыгынын жана профсоюз кызматкерлери катышты.

Майрамдык салтанатта сөз сүйлөгөн шаардын вице-мэри Айзат Раматиллаева, бул тармакта иштегендер өз эмгектерин  эң баалуу ишке – мамлекеттин жардамына жана камкордугуна муктаж жарандарды колдоо ишине арнап келише тургандыгын айтты.

- Алар эң оболу, улгайган адамдар, ден-соолугунун мүмкүнчүлүгү чектелген жарандар, согуштун жана эмгектин ардагерлери, турмуштук кыйын кырдаалга туш болгон үй-бүлөлөр, ошондой эле мамлекеттин социалдык саясатынын борборунда турган  балдар  менен иштеп келишет.  Биздин жалпы максатыбыз кызматкерлерди социалдык, эмгектик укуктарын коргоонун бийик салттарын улоо менен калктын жардамга муктаж аярлуу катмарына жардам көрсөтүү дейт,-А. Раматиллаева.

Азыркы учурда, Жалал-Абад шаарында  3 миң 360 жакыр үй-бүлө болсо, кары-картандардын саны  161ди түзөт, ал эми ден- соолугунан мүмкүнчүлгү чектелген 3 миң 103 адам бар. Элдин жардамга муктаж катмары менен иш алып барууда шаада социалдык коргоо тармагында 66, ал эми шаардык социалдык фонддо 25 кызматкер эмгектенип келет. Майрамдык иш-чаранын соңунда шаар мэриясы тарабынан  бул тармакта  эмгектенип жаткан активдүү кызматкерлер сыйланып, шаардык маданият үйү тарабынан даярдалган чакан концерттик программа тартууланды.