18-октябрда Жалал-Абад шаарындагы Токтосун Тыныбеков атындагы облустук филармонияда мыкты спортсмендерди сыйлоо иш-чарасы болуп өттү. Бул туурасында ыйгарым укуктуу өкүлдүн басма сөз катчысы маалымдады.

Спортсмендерге сый-урмат көрсөтүүнүн алдында Токтосун Тыныбеков атындагы облустук филармониянын өнөпоздору кеңири программадагы концерт тартуулашты. Быйылкы жылы Жалал-Абад облусунун спортсмендери Чолпон-Ата шаарында өткөрүлгөн “Манас оюндарында” жана Түркмөнстан мамлекетинин Ашхабад шаарындагы V Азия оюндарында мыкты көрсөткүчтөрдү камсыз кылышкан. Жеңиш менен кайткан спортсмендерге сый-урмат көрсөтүлүп, акчалай сыйлыктар тапшырылып, спортсмендер менен машыктыруучуларды ыйгарым укуктуу өкүл Кыянбек Сатыбалдиев куттуктады.

- Жалал-Абад облусунун спортсмендери эл аралык мелдештерде такай байгелүү орундарды камсыз кылып келе жатышат. Спорт - улуту, дини жана саясий көз караштары ар түрдүү болгон адамдарды, дене тарбиясы менен спортко кайдыгер карабагандарды жана сергек жашоо мүнөздөрүн алып жүргөндөрдү ар дайым бириктирип, достук менен карым-катнашты жакшыртып келет.  Спортсмендер өсүп келе жаткан жаш муундарга үлгү жана өрнөк болушууда. Кыргызстандын желеги спорттук мелдештерде ар дайым бийик желбирей берсин,- деди өкүл Кыянбек Сатыбалдиев.

Түркмөнстандын борбору Ашхабад шаарында өткөн жабык имараттагы V Азия оюндарынын жүрүшүндө грек-рим күрөшү боюнча  Калы Сулайманов 1-орунду жана алтын медалды камсыз кылса, жеңил атлетчи кызыбыз Гүлшанай Сатарова байгелүү 2-орунду камсыз кылып, күмүш медаль тагынган. Ал эми, алыш күрөшү боюнча Руслан Табалдиев 2-орунду камсыз кылып, күмүш медаль тагынса,  Шаршеналы уулу Мадан,  Кадырбек Келсинбеков менен Ильяз Нышанов байгелүү 3-орунду камсыз кылышып, коло медалдардын ээлери болуп калышты.

 Ал эми,  25-31-август күндөрү Ысык-Көл облусунун Чолпон-Ата шаарында “Ыйман, адеп жана маданият” жылына жана Кыргыз Республикасынын Эгемендүүлүк күнүнө карата республикалык “Манас оюндары” мелдештерине катышкан облусубуздун спортсмендери оюндун 9 түрүнөн күч сынашып, Жалал-Абад облусунун курама командасы байгелүү 3 орунду камсыз кылышты. Тагыраак айтканда, облустун курама командасынын мүчөлөрү 5 алтын, 8 күмүш жана 6 коло медалдын татыктуу ээлери болуп калышты. “Манас оюндарында” командалык үчүнчү орунду камсыз кылган Жалал-Абад облусунун курама командасы 1 млн. сомдук сертификат менен сыйланган.

Кыргызстандын намысын татыктуу коргоп келе жатышкан спортсмендер менен машыктыруучуларды ыйгарым укуктуу өкүл Кыянбек Сатыбалдиев, Аксы районунун акими Масалбек Мырзамамытов, Таш-Көмүр шаарынын мэринин милдетин аткаруучу Өмүржан Бабатаев жана Жалал-Абад шаарынын биринчи вице-мэри Турдалы Темирбаев куттукташып, аларга акчалай сыйлыктарды тапшырышты.

Жолдошбай Осмонов, Жалал-Абад облусу