Кыргызстанда бардык шайлоо тилкелери жабылды. Шайлоо боюнча борбордук комиссия болжолдуу добуштардын жыйынтыгын чыгарууда, жыйынтык боюнча алдыда Сооронбай Жээнбеков келе жатат.

Боршайкомдун төрайымы Нуржан Шайлдабекова билдиргендей, Жээнбеков саат 20:30га карата – 54,6%, Өмүрбек Бабанов – 33,9% добуш алган.

БШКнын берген маалыматы боюнча, Адахан Мадумаров – 6,56%, Сариев – 5,55% добуш алган.

Борбордук шайлоо комиссиясынын маалыматына караганда, президенттик шайлоодо добуш берген шайлоочулардын саны акыркы эсеп боюнча 55,93% түздү. Жалпысынан каттоодон 3,025,770 шайлоочу өткөн.

Бардыгы болуп республика боюнча 2375 шайлоо тилкеси иштеди. Ошондой эле 37 тилкеси чет жерлерде ТИМ мекемелеринде жайгашкан.