Кыргыз Республикасынын Премьер-министри Сапар Исаков кечээ, 11-октябрда Сочиде өткөн КМШ башчыларынын жана Жогорку Евразиялык экономикалык кеңештин жыйынында Казакстандын президенти Нурсултан Назарбаев менен сүйлөшүп, кыргыз-казак чек арасындагы абал тууралуу маалымат берген. Бул тууралуу КР өкмөтүнүн маалымат кызматы билдирди.

Өкмөттүн Аппаратынын маалыматтык камсыздоо бөлүмүнөн билдиршкендей, жолугушуу учурунда Өкмөт башчы С. Исаков Казакстандын президенти Н.Назарбаевге учурдагы кыргыз-казак чек арасындагы кырдаал тууралуу маалымат берип, мындагы жаралган көйгөйдөн бир эле Кыргызстандын эмес казакстандык жана үчүнчү өлкөнүн жарандары да кыйналып жатканын айткан.

"Сүйлөшүүдөн кийин, Нурсултан Назарбаев казак өкмөтүнө чек арада түзүлгөн кырдаалды жөнгө салуу боюнча буйрук берди", — деп айтылат билдирүүдө. 

Эскерте кетсек, 10-октябрда кечинде кыргыз-казак чек ара бекеттеринде кезек күткөндөрдүн саны өсүп, алар бир нече сааттап туруп жатышкандыктарын айта башташкан.

Ал эми 11-октябрда да абал өзгөргөн эмес. Казакстандын Улуттук коопсуздук комитети өлкөнүн бардык чек араларында атайын операция жүргөндүктөн жогорудагыдай кырдаал  тузүлгөндүгүн кечинде гана маалымдады.