Жалал-Абад шаарында мамлекеттик тилди өнүктүрүүнүн мурда жарыяланган үч айлыгынын алкагында Укук, бизнес, билим берүү академиясынын студенттери тарабынан мамлекеттик тилди даңазалоо, кеңири жайылтуу, улуттук баалулуктардын баркын көтөрүү таризинде кезектеги кароо-сынак өткөрүлдү. Бул тууралу шаар мэриясынан билдиришти.

Кароо-сынакта катышуучулары – акамдемиянын бөлүмдөрүндө окуган биринчи жана экинчи курстардын студенттери “Саламдашуу”, “Манас” эпосунан үзүндү айтуу, “Элдик кыргыз ырларын ырдоо”, “Кыргыз бийин бийлөө” сыяктуу номерлер менен кароонун катышуучулары улуттук баалуулуктарды, өнөрдү, тарыхты канчалык жакшы өздөштүрүшкөнүн көрсөтүштү. Андан сырткары, улуттук кийимдерди демонстрациялдоо ишке ашырылды.

Алынган маалыматка караганда, бул кароо-сынакта алдыңкы орундарды ээлеген командалар жана жеке студенттер окуу жайы тарабынан Ардак грамоталар, белектер менен сыйланышты.

Эскерте кетсек, Жалал-Абад шаардык мэриясы тарабынан мамлекеттик тилди өнүктүрүү боюнча үч айлык жарыяланган жана аны уюшкандыкта жана жогорку деңгээлде өткөрүү боюнча иш-чаралар иштелип чыккан. Үч айлыктын жыйынтыгында өзгөчөлөнгөндөр шаар мэриясы тарабынан акчалай сыйлыктарга ээ болушат.