КР Вице-премьер министри, КР Президентин шайлоону өткөрүү боюнча республикалык штабтын жетекчиси Дуйшенбек Зилалиев түштүк регионуна атайын иш сапарга чыгып, шайлоого болгон даярдыктын жүрүшү менен жакындан таанышып жатат. Бул тууралуу ал өзү журналисттерге берген маегинде билдирди.

Анын айтымында, КР Өкмөтүнүн буйругу менен респбуликалык штабтын жетекчиси болуп дайындалган. Үстүбүздөгү жылдын 15-октябрында өтө турган президенттик шайлоого бардык региондордо даярдык иштери жакшы жүрүүдө.

- Баткенди кыдырып келдик. Эң негизги биздин максатыбыз – шайлоо участкалырынын даярдыгын көрүү. Мына Жалал-Абад шаарын, Сузак районунун көрдүк. Даярдык жетиштүү деңгээлде деп айтсам, мен жаңылбайм. Бир аз кемчиликтер бар. Алардын баарын көрсөттүк. Бир жуманын ичинде ал кемчиликтерди жоюуга аракет кылышат. Шайлоого биз даяр болуп киребиз десем, мен жаңылышпайм. Бардык шайлоо участкалырын материалдык-техникалык камсыздоо боюнча эч кандай кемчиликтер жок. Операторлор окутулуп, даярдалган, урналардын баары бар. Камсызздоо жактан эч кандай кемчилик жок. Чет мамлекеттерде 37 шайлоо участкалары бар. Бул биздин жарандар басымдуу болгон Казакстанда, Россияда, Түркияда жана башка мамлекеттерден биздин жарандар добуш бере алышат, - деди Д.Зилалиев.

Эскерте кетсек, өлкөдө президенттик шайлоонү өткөрүүгө 670 миллион сомдон ашык акча каралган.