Бүгүн, 20-сентябрь күнү КР Вице-премьер министри Дуйшенбек Зилалиев Жалал-Абад облусуна болгон бир күндүк иш сапарынын алкагында бир катар шайлоо участкалырынын абалы менен таанышып чыкты. 

Ал эми талапка жооп бербеген шайлоо участокторундагы кемчиликтерди тез арада четтетүү боюнча жергиликтүү бийликке өзүнүн тапшырмасын берди.

Алгач Д.Зилалиев Жалал-Абад шаарындагы кыргыз-түрк балдар лицейинде жайгашкан №2399 шайлоо участогуна барып, 15-октябрда өтө турган КР Президентин шайлоого  карата даярдыктын жүрүшү менен таанышып, кандай кемчиликтер бар экендигин өз көзү менен таанышып чыкты. Бул шайлоо участокто 2018 шайлоочу бар болсо, кошумча №2 форма менен келгендер менен 3 миңге жакын шайлоочу келээри маалым болду. Аталган лицейде шайлоого карата бардык шарттар түзүлүп, шайлоочулардын тизмелери илинген.

Андан кийин, шаардагы №75 кесиптик-лицейде жайгашкан №2101 шайлоо участогунда шайлоочулар үчүн добуш берүү жайы тар болгондуктан, шайлоого чейин шайлоочуларга кеңири жай деп ашкананы табышкандыктан, эми ал жерге шайлоо күнүнө чейин участкалык шайлоо комиссиясы бардык шарттарды түзө тургандыгын шаардын мэринин милдетин аткаруучу С.Авазов баса белгиледи. Бул шайлоо участокто 700дөн ашык шайлоочу бар.

Ал эми Сузак районунун Мадумар-Ата №2406 шайлоо участкасынын учурдагы абалы менен да Д.Зилалиев баштаган жергиликтүү бийлик өкүлдөрү таанышып чыгышып, ал жер канааттандырарлык экени белгилүү болду. Бул шайлоо участогунда 701 шайлоочу бар. Шайлоочулардын тизмеси илинип, бардык шарттар түзүлгөн.

Эң аянычтуу абал Сузак районунун борборуна жакын жерде жайгашкан №2393 шайлоо участогу экендиги текшерүү учурунда белгилүү болду.

Шайлоо участкасы жайгашкан бөлмөнүн абалы начар, караңгы жана дубалдары көчүп, киргенде эле сыз жыттанып турат экен. Вице-премьер министр Д.Зилалиев 10 күндүн аралыгында шайлоо учассткасына бөлүнгөн бөлмөнү актап, сырдап оң абалга алып келүүнү райондун акимине табыштады.