Нарын облусунда 21-сентябрдан 23-сентябрга чейин өтүүчү “Жалал-Абад күндөрүнүн” алкагында Жалал-Абад облустук Барпы атындагы драма театрынын чыгармачыл жамааты Курманбек баатырдын эрдигин чагылдырган сахналык көрүнүштү коюшмакчы. Бул тууралуу аталган театрдын адабий бөлүм башчысы Айгерим Дүйшө кызы билдирди.

-“Ыйман, адеп жана маданият” жылынын алкагында  облустук театрлардын кызматкерлери бири-бирибизге барып, өз ара тажрыйба алмашып жатабыз. “Жалал-Абад күндөрүнүн” алкагында Нарын облусуна баруу менен ал аймактын театр өнөрпоздору менен чыгармачылык байланыштарыбызды бекемдемекчибиз. Буюрса, кийин иргелешкен ыгармачылык долбоорлорду ишке ашыруу да мүмкүн болуп калар, - дейт ал.

Эскерте кетсек, облустук театрдын чыгармачыл жамааты быйылкы жылы Жалал-Абад облусундагы район-шаарларга япон драматургу Киносита Дзюндзинин “Каркыранын канаты”  спектаклин тартууламакчы. Бул спектаклде адамгерчиликтен да, сүйүүдөн да байлыкты тандап кеткен Йохио аттуу япон дыйканынын образы чагылдырылат. Андан  соң, Жалал-Абад шаарынын тургундарына Грузин драматургу А. Цагарелинин “Ханума” комедиясын коюу пландалууда.