Жалал-Абадда облустук үй-бүлөлүк медицина борборунун демилгеси менен мамлекеттик мекеме-ишканаларда эмгектенген жарандардын ден-соолугуна кам көрүү максатында ”Өз кан басымыңды билип ал” аталышындагы бир апталык акция журүп жатат. Бул тууралуу облустук үй-бүлөлүк дарыгерлер борборунун директорунун орун басары Кадича Пратова билдирди.

Анын айтымында, мамлекеттик жана жергиликтүү өз алдынча башкаруу органдарына тиешелүү мекемелерде эмгектенген кызматкерлердин ден-соолугуна кам көрүү максатында облустун бир катар мекеме-ишканаларында “Өз кан басымыңды билип ал “аталышындагы акция башталды.

- Негизинен көп жарандар өздөрүнүн канча кан басымда жүргөнүн билишпейт. Өз ден-соолугуна кайдыгер болуп, бир жылда бир медициналык көзөмөлдөн өтпөгөн жарандарыбыз да аз эмес. Өткөрүлүп жаткан акциянын алкагында жарандардын кан басымы көрсөтүлгөн нормадан жогору же төмөн болсо, аларга өздөрү катталган дарылануучу пункттарга кайрылуулары боюнча кеп-кеңештер берилет.  Бул акцияны үй-бүлөлүк дарыгерлер тобунун ден-соолукту чыңдоо бөлүмүнүн адистери өткөрүп жатат жана ал бир жумага уланат, - дейт К. Пратова.