«Өзбекнефтегаз» ишканасы мунайды кайра иштетүү заводдору үчүн 2018-жылдан тарта Орусия менен Казакстандан миллион тоннага жакын мунай импорттоп турууну пландап жатат. Бул тууралуу РИА Новости агенттигине компания башкармалыгынын төрагасы Алишер Султанов билдирген.

«Тесттик режимде сентябрда 30 миң тонна, жылдын аягына чейин 200 миң тоннага чейин мунай алууну пландап жатабыз. Кийинки жылы бул көрсөткүчтү бир миллион тоннага чейин жеткиребиз. Учурда орусиялык өнөктөштөр менен өкмөттөр аралык макулдашуу даярдалууда. Казакстан менен келишим түзгөнбүз», – деди Султанов.

«Өзбекнефтегаздын» башчысы мунай тесттик режимде Омск — Павлодар — Шымкент мунай кууру аркылуу алынып, андан ары темир жол эстакадасы менен Өзбекстандын аймагына жеткирилерин айтты.

Султановдун билдиришинче, «Өзбекнефтегаз» ишканасы 2018-2020-жылдар аралыгында бир миллион тоннага жакын чийки мунай импорттоп, 2021-жылы Жизак облусунда мунайды кайра иштетүү комплекси ишке берилгенден кийин импорттун көлөмүн беш миллион тоннага чейин жеткирет.

Мурдараак Казакстандын президенти Нурсултан Назарбаев өлкө Өзбекстанга миллион тоннага жакын даяр мунайзатын жеткире аларын билдирген.