16-сентябрдагы селектордук жыйындын жүрүшүндө Өзбекстандын Анжиян облусунун башчысы имамдарга мечитке келген адамдарды жана маале жашоочуларын пахта талааларына чыгарууну тапшырды.

«Азаттыктын» өзбек кызматынын маалыматына караганда, селектордук жыйынга имамдар, диний насаатчылар, дин иштери боюнча кеңешчилер, маале төрагалары жана башка жергиликтүү активисттер катышкан.

Атын айткысы келбеген жергиликтүү имамдардын биринин айтымында, анда негизги тема — адамдарды пахта терүүгө чыгаруу болуп, чогулгандарга 10-15 кишиден турган топторду түзүү тапшырылды.

Имам жыл сайын Өзбекстанда пахта терим өнөктүгү башталганда жергиликтүү бийлик имамдарды чогултуп, түшүм жыйноо топторун түзүүнү тапшыра тургандыктарын айтты. «Өткөн жылы (Өзбекстандын биринчи президенти Ислам Каримовдун каза болгондугунан улам) аза күтүүгө байланыштуу бизге эч ким кызыккан эмес. Андан мурдагы жылдары пахта талааларына көптөгөн адамдарды чыгарып келгенбиз», – деди имам.

Социалдык түйүндөрдүн өзбекстандык колдонуучулары билдиришкендей, пахта терүү өнөктүгүнө топторду түзүүгө имамдарды тартуу көрүнүштөрү Өзбекстандын башка аймактарында дагы байкалууда.