Жалал-Абад шаарында мектеп окуучуларынын коопсуздугу үчүн жол боюнда жайгашкан мектептердин, бала бакчалардын, окуу жайларынын тушундагы көчөлөргө жол сызыктары жана жол белгилери камсыз кылынган. Бул тууралуу шаардык мэриянын басма сөз кызматы билдирди.

Алынган маалыматка караганда, айрым маалымат булактары аркылуу Жалал-Абад шаарынын мектептеринин жанында жөө адамдар өтүүчү жол белгилери коюлбагандыгы тууралуу таркатылган маалымат чындыкка туура келбейт. Бул тууралуу Жалал-Абад шаардык коммуналдык чарба жана көрктөндүрүү департаментинин башкы инженери Рашид Назаралиев билдирген.

Анын айтымында, шаар бийликтери быйылкы жылы көчөлөргө 2 миң чарчы метрлик же суммасы 2 миллион сомдук жөө атуулдар өтүүчү жол сызыктарын сызууну, жол белгилерин орнотууну пландаштырган.

-Бирок, тилекке каршы, шаардын бюджети ушул кезге чейин бекитилбей жаткандыгына байланыштуу биз пландаштырган иштердин толук көлөмүн аткара алган жокпуз. Себеби, бюджеттен бизге зарыл болгон сумманын 12ден бир бөлүгүн гана алып, иштетип келе жатабыз. Ошондо биз бюджеттен 7 айдын акча каражатын  топтоп алып, азыркы учурга чейин жол боюнда жайгашкан мектептердин, окуу жайлардын, бала бакчалардын тушуна жол сызыктарын, жол белгилерин камсыз кылдык.  Шаар боюнча бул иштер улантылууд, - дейт ал.

Алынган маалыматтарга караганда, айрым мектептердин тушунда жол сызыктары жаңы окуу жылына чейин даяр болбой калган, себеби шаарда суу жана саркынды суу, газ түтүктөрүн орнотуу, көчөлөргө асфальт басуу иштери тынымсыз жүрүп жатканы үчүн айрым участоктордо иш кечеңдеген. Бирок, азыркы учурга карата бардык мектептердин, бала бакчалардын, окуу жайларынын тушунда жол сызыктары жана жол белгилери толук камсыз кылынып бүттү.

Эскерте кетсек, шаар бюджетинин бекитилбей, шаардагы аткарылуучу иштер каржыланбай калгагына карабастан, шаардык коммуналдык чарба жана көрктөндүрүү департаменти дээрлик 1 миң чарчы метрге жол сызыктарын сызып, 52 даана жол бегилерин коюп чыккан. Бул иштер дагы да улантылууда.