1-сентябрь – Билим күнүндө Сузак районуна караштуу Ырыс айыл аймагынын Кыр-Жол айылында №43 Исраил Карабаев атындагы жалпы билим берүүчү орто мектебинин салтанаттуу ачылыш аземи болуп өттү. Бул туурасында ыйгарым укуктуу өкүлдүн басма сөз катчысы Жолдошбай Осмонов маалымдады.

Жаңы мектептин салтанаттуу ачылыш аземине катышкан Кыр-Жол айылынын жашоочуларын, мугалимдер менен окуучуларды КРнын вице-премьер-министри Дүйшөнбек Зилалиев, КРнын Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев, Сузак районунун акими Эрмек Ормошев бүгүнкү Билим күнү жана Курбан айт майрамы менен куттукташты.

-- 2015-жылдын 23-майында Кыр-Жол айылында жер көчкү жүрүп, 6 мекендешибиздин өмүрү кыйылган болчу. Ошондо Кыр-Жол айылына атайын келген Кыргыз Республикасынын Президенти Алмазбек Атамбаевден жаңы мектеп куруп берүү өтүнүчү менен элибиздин атынан кайрылган элек. Биз, Кыр-Жол айылынын жашоочулары мамлекет башчысына терең ыраазыбыз. Бүгүн минтип, республикалык бюджеттин эсебинен заңгыраган жаңы мектеп бүткөрүлүп, ишке берилип олтурат. Мындан сырткары жер көчкүдөн улам үй-жайсыз калышкан 8 атуулубузга мамлекеттин эсебинен акысыз үйлөр салынып, жаңы үйлөрдүн ачкычтары айылдаштарыбызга тапшырылды. Элине кам көрүп, жан күйгүзгөн Президентибиз Алмазбек Атамбаевге бекем ден соолук жана мамлекетти башкаруудагы жооптуу ишине элибиздин атынан ийгилик каалайбыз,- деди Кыр-Жол айылынын кадырман аксакалы  Мурат Паизов.

КР вице-премьер-министри Дүйшөнбек Зилалиев баштаган жетекчилер жаңы мектептин кызыл тасмасын кесишип, мектептин класстарын жана спорт залын көздөн кечирип чыгышты.

Кыр-Жол айылындагы №43 Исраил Карабаев атындагы жалпы билим берүүчү орто мектебинин курулушун Муктар Маматкулов жетектеген “Базар-Коргон айыл курулуш” ААКсынын куруучулары 2 жылда сапаттуу бүткөрүштү. Мектептин курулушуна республикалык бюджеттен 33 млн. сом акча каражаты сарпталган. Аталган мектепте учурда 212 окуучулар билим алышып, аларга 18 мугалимдер татыктуу таалим-тарбия берип жатышат.