Кошмо Штаттар Балтия аймагындагы Орусиянын ири аскердик машыгууларын утурлай, НАТОго мүчө Литва, Латвия жана Эстония өлкөлөрүн абадан күзөтүү үчүн истребителдердин күчөтүлгөн бөлүгүн жөнөттү.

Москванын “Батыш” машыгуусу 14-20-сентябрда өтөт. Ал Орусиянын Батыш аскерий округу менен бирге НАТОнун үч мамлекети менен чектешкен Беларустун аймагын да камтыйт. Кремль ири масштабдагы машыгуу коргонуу дараметин сыноо үчүн гана өтөрүн белгилегени менен бул чөлкөмдө тынчсызданууну жаратууда.

Балтия аймагын күзөтүү үчүн ушул аптада Шяуляй аэродромуна АКШнын жети F-15C үлгүсүндөгү учагы конду. Крым аннексияланганда дагы НАТО Прибалтика чөлкөмүнө мынчалык көлөмдө аскер күчтөрүн жөнөткөн эмес.

Балтиянын үч өлкөсүндө истербителдер жок, мындан улам алар НАТОго ишеним артышууда. Машыгуунун алдында АКШ кошумча аскер аба күчтөрүнүн 600 аскерин жөнөткөн.

Ал эми Орусия менен Беларус 14-20-сентябрда өтүүчү машыгууга 12700 аскер катышаарын ырастап келатышат. Бирок Батыштагы аскерий адистери иш жүзүндө 100 миңге чейин жоокер тартылышы мүмкүн дешет.