Финляндия полициясы Турку шаарында бычак менен кол салып, эки аялды өлтүргөн марокколуктун чыныгы атын аныктады. Маалыматтарга караганда, ал 2016-жылы Финляндияга жалган ысым менен кирген. Буга чейин 1994-жылы туулган марокколук Абдеррахман Мечко шектүү саналып жаткан.

“Анын тек-жайы аныкталды, демек, ким менен иш алып барып жатканыбызды билебиз”,-деди Финляндиянын Улуттук иликтөө бюросунун детектив агенттигинин башкы инспектору Криста Гранрот. Полиция шектүүнүн чыныгы ысымын жана жаш курагын айткан жок.

Турку деген шаарда 18-августта бычак менен кол салуулар болгон. Андан кеминде эки адам өлүп, сегизи жаракат алган. Шаардын борбордук аянтына жакын жердеги окуя Финляндиядагы алгачкы террордук чабуул катары иликтөөгө алынган.

Камакка алынган шектүү кол салуу үчүн жоопкерчиликти өз мойнуна аларын билдирип, бирок мотиви терроризм экенин четке каккан. Ал Финляндияга 2016-жылы келип, Туркуда качкындар лагеринде жашап жаткан. Терактка чейин ага өлкө бийлиги баш паанек берүүдөн баш тарткан.