Жалал-Абад шаарындагы мекеме-ишканаларынын кызмактерлеринин арасында кыргыз тилиндеги иш кагаздары канчалык деңгээлде туура жазылып жаткандыгын билүү максатында "Сапаттуу жазалы" акциясы башталды.  Бул тууралуу шаар мэриясынан билдиришти.

Сынак жалпы мекеме-ишканалар арасында өткөрүлүп, сынактын максаты кыргыз тилин өнүктүрүү жана жалпы иш кагаздарын мамлекеттик тилде сапаттуу жүргүзүүгө багытталган. КР Президентине караштуу мамлекеттик тил боюнча комиссиясынын Жалал-Абаддагы өкүлү Үпөл Асаналиеванын айтымында, шаар аймагындагы мекеме-ишканаларда иш кагаздары менен иштеген тиешелүү адистер чакырылган.

-Акцияга 50дөй кызматкер  келип катышышты. Биз бул акция менен гана чектелбестен ар тараптуу башка да иш-чараларды уюштурабыз. Муну менен биз жергиликтүү бийликтерде иштеген кызматкерлердин мамлекеттик иш кагаздарын кыргыз тилинде канчалык деңгээлде даярдап жатышканын билебиз, - дейт ал.

Акция мындан ары укук коргоо органдарынын кызматкерлеринин арасында жат жазуу алуу менен улантылат жана жыйынтыгы 23-сентябрда бегиленүүчү мамлекеттик тил майрамына карата чыгарылып, өзгөчолөнгөндөргө атайын баалуу белектер тапшырылат.