"Иран: 91-97-жылдардагы жарандык согушту колдоо" аттуу даректүү тасма башка тилдерге которулуп интернетке жайгаштырылды. Тажикстан ИИМи тарабынан даярдалган 45 мүнөттүк тасмада расмий Душанбе Тегеранды жарандык согуш маалындагы теракттарды каржылоого айыптаган. Фильм 8-августта “Точикистон” телеканалы аркылуу прайм-тайм маалында көрсөтүлгөн.

17-августтан тарта интернет колдонуучулар бул чуулгандуу тасманы тажикче гана эмес, орус, англис, араб жана өзбек тилдеринде дагы көрө башташты. "Иран: 91-97-жылдардагы жарандык согушту колдоо" фильми шаршемби күнү беш тилде Фейсбук, YouTube, Одноклассники жана өкмөттүк сайттарда пайда болду.

Тажикстан ИИМинен тасманы башка тилде ким которгонун билбей турганын маалымдашты.

Дипломатиялык жаңжалга жол ачкан тасмада 90-жылдары жарандык согуш маалында Иран террорчуларды каржылаган, алар тажик коргоо министринин мурунку орун басары, генерал Абдухалим Назарзоданын жеке тапшырмасы менен белгилүү саясатчыларды, коомдук ишмерлерди, журналисттерди өлтүргөн деген тыянак чыгарылган.

Ирандын Тажикстандагы элчилиги бул айыптоолорду четке кагып, атайын билдирүү тараткан. Анда даректүү тасма соттолгон кишилердин көрсөтмөлөрүнө жана көзү өтүп кеткен адамдардын билдирүүлөрүнө негизделип даярдалганы жана бул чындыкка коошпой турганы айтылган.