“Жалал-Абад Тазалык” муниципалдык ишканасы шаардагы алдын ала дезинфекциялоо ишканасы менен менен бирдикте атайын таштанды таштоочу урналарды жана жайларды зыянсыздандыруу иштеринин кезектеги этабын жүргүзүп жатат. Бул тууралуу аталган ишканадан билдиришти.

Алынган маалыматка караганда, күндүн ысык температурасында таштанды салыган урналардан, жайлардан жагымсыз жыт жана ар кандай ооруларды козгогучтар айланага таркап, калкка зыян келтирет. Ошонун алдын алуу үчүн бардык таштанды таштоочу жайларда зыянсыздандыруу иштери жүрүп жатат.

-Бүгүнкү күнү шаардык санитардык-эпидеомилогиялык көзөмөл борбору менен түзүлгөн келишимдин негизинде атайын адистер зыянсыздандыруу жумуштарын аткарушууда. Буга чейин зыянсыздандыруу иштерин өзүбүздүн кызматкерлер жасашчу. Эми аны адистер жасашууда, мындан ары мындай иш-чаралар такай аткарылып турат. Шаарыбыз таза, жагымдуу болсо, биздин эмгегибиздин акыбети кайтат, - дейт “Жалал-Абад тазалык” муниципалдык ишканасынын башкы диспетчери Ахатбек Тажибаев.

Эске сала кетсек, “Жалал-Абад тазалык” мунициалдык ишканасында жалпы 78 кызматкер иштейт жана адистештирилген атайын 16 техника бар. Ал эми шаар боюнча жалпы 360 атайын таштанды таштоочу урналар жайгаштырылган.