Кечээ, 9-август күнү Жалал-Абад шаарында жайгашкан базарларда өрт коопсуздугунун алдын алуу боюнча атайын рейд жүргүзүлдү. Бул тууралуу шаардык мэриянын басма сөз кызматы билдирди.

Аталган рейдге Жалал-Абад шаардык мэриясынан, экологиялык жана техникалык коопсуздук боюнча мамлекеттик инспексиясы жана шаардык өрткө каршы мамлекетик кызматынын кызматкерлери катышты.   Мында базардагы жеке менчик дүкөндөрдүн алдындагы товарларларын жайып алгандарга жана жолго чыгып кеткен соодагерлерге түшүндүрүү  иштерин жүргүзүштү. Ал эми шаардык өрткө  каршы  кызматынын бөлүмүнүн  башчысынын орун басары Чынарбек Шекеновдун айтымында, мындай рейд ушул жума ичи шаардагы бардык соода түйүндөрүндө болмокчу.

"Бүгүнкү өткөргөн  иш-чаранын негизги максаты – жалпыга маалым болгондой жакынкы күндөрү Өзгөн районунда базар өрттөнүп  кетип, бир топ адамдарга кыйынчылык жаралган. Ошол окуядан соң, биз шаардык мэрияга кат жолдогонбуз. Андан көп узабай буйрук чыгарып, ошол буйруктун негизинде соода түйүндөрүн текшерүүдөбүз. Мына ушул бир жуманын ичинде базарлардын баарысын  толук текшерип чыгабыз",-дейт орунбасар Ч. Шекенов.

Белгилей кетсек,  шаардагы соода-сакыт жүргөн базарлардын жалпы аянты 2 гектарды түзөт.  Мында 125 жеке менчик дүкөндөр бар. Бир күндө  5 миңден ашык адам мына ушул борборбук базардан өз муктаждыктарын кандырып келишет.​​​​