“Тарых жана маданият” жылына карата  Барпы театры Эрнис Турсуновдун “Жаныбек казы” аттуу тарыхый драмасын алып чыккан. Спектакль Жалал-Абад облусунун көрүүчүлөрүнө коюлуп, эл жылуу кабыл алган соң, Бишкек шаарындагы Т. Абдумомунов атындагы кыргыз улуттук академиялык драма театрында коюлду. Бул тууралуу маалыматты Жалал-Абад облустук Барпы атындагы кыргыз драма театрынын адабий бөлүм башчысы Айгерим Дүйшө кызы билдирди.

Анын айтымында, анда көрүүчү катары КР Маданият, маалымат жана туризм министри Алтынбек Максутов баштаган бир топ жетекчилер келишип, өздөрүнүн ойлорун айтышты. Ушул эле спектакль Токтогул, Таш-Көмүр шаарларында коюлду. Андан соң, 25-май күнү ордолуу Ош шаарында спектакль уюшулуп, Жаныбек казынын урпактары да келишип, спектаклди алып чыккандарга, уюштуруу иштерин жүргүзгөндөргө, катышкан актер, актрисаларга ыраазычылыктарын билдиришти.

“Ал эми ушул эле спектакль 26-май күнү Баткен облустук Апаз Жайнаков атындагы музыкалык драма театрында коюлду. Тарыхый драмага 21 каарман катышкан. Эки саатка созулган драманы эл кызыгуу менен кабыл алышты. Жаныбек казы элдин сабаттуу болуусуна умтулган жана Совет өкмөтүнө ак кызмат кылган. Бирок, чагымчыл күчтөр тарабынан караланып, басмачы, эл душманы аталган. Аталган драма алгач театрдын көркөм кеңешинен, КР Маданият, маалымат жана туризм министрлигинен келген комиссиянын сынынан өтүп, спектакльди коюуга уруксат берилген”, - дейт А. Дүйшө кызы.