"Новая газетанын" кабарчысы Али Ферузду Орусия соту Өзбекстанга депортациялоону чечкен соң, журналист өзүнө кол салууга аракет жасады. Бул тууралуу"Новая газета" басылмасы Феруздун адвокаты Даниил Хаймовичке шилтеме берүү менен билдирди.

Адвокаттын айтымында, Феруз сот имаратында депортация боюнча токтомдун көчүрмөсүн күтүп жатканда суицидке барууга аракет жасаган. Аны соттук приставдар токтотуп, Сахароводогу атайын кабыл алуу жайына жеткиришкен. Журналист “Өзбекстанга баргандан көрө өлгөнүм артык” деп билдирген.

Москванын Басман райондук соту 1-августта Али Ферузду (Худоберди Нурматов) мажбурлоо менен Орусиянын аймагынан чыгаруу тууралуу чечим чыгарган. Журналистке 5 миң сом өлчөмүндө айып салынганын аталган гезиттин кабарчысы Екатерина Фомина билдирген.

Сот Феруз чет элдик жарандардын Орусияда жүрүү тартибин бузду деп тапкан. Ал күнөөсүн моюнга алган жок. Журналист он күн ичинде сотун чечимин даттанууга укуктуу.

Журналист шейшембиде кармалган. Буга чейин полиция анын орус жергесинде 2011-жылдан бери мыйзамсыз жүргөнүн маалымдаган.

Али Феруз Өзбекстандан сегиз жыл мурун чыгып кеткен. Буга атайын кызматтар кызматташууга мажбурлаганы себеп экенин айткан. Июндун башында орус бийлиги ага убактылуу башпаанек берүүдөн баш тартканы белгилүү болгон. Феруздун айтымында, Өзбекстанда ага террордук уюмдар менен кызматташкан деген айып тагылышы мүмкүн.