Бүгүн, 3-август күнү Ала-Бука районунда алтын кенин иштеткен ОсОО “Фулл Голд Майнинг” компаниясынын Генералдык директору Луо Хуансуо ЭлТРКнын Жалал-Абаддагы өкүлчүлүгүнө 240 миң сомдук видео камера тапшырды.

Генералдык директор Луо Хуансуонун сөзүнө караганда, алтын кенин казган ОсОО “Фулл Голд Майнинг” ишканасы 2006-жылы июнь айында түптөлгөн.

- Ошол убакыттан баштап 200 млн. сомдук инвестиция салынган. Мамлекетке төлөнгөн салыктын наркы 810 млн. сом болот. Жергиликтүү айылдарга демөөрчүлүк көрсөтүү 60 млн. сомду түзөт. Анан биз жергиликтүү тургундар, жергиликтүү бийлик менен жакшы мамиледе болуп, аларга да колдон келишинче жардамдарды берип жатабыз. Жергиликтүү бийлик менен тыгыз иштешебиз. Биздин негизги максатыбыз – Кыргызстандагы бардык мыйзамдырды так сактаганга аракет кылабыз. Компанияда азыркы учурда 713 адам эмгектенсе, анын ичинен 613ү кыргыздар. Мындайча айтканда, биздин аткарган иштерибиздин бардыгы Кыргызстандын мыйзамдарына дал келет. Бул дагы болсо, Кытай менен Кыргызстандын ортосундагы достукту бекемдөөгө жакшы шарт түзүп берет. Колдон келишинче, жергиликтүү телеканалдарга колдоо көрсөткөнгө даярбыз. ЭлТР компаниясынын ишине көмөктөшүү үчүн атайын видео камера алып бердик, - деди Луо Хуансуо мырза.

Ал эми ЭлТРКнын Жалал-Абад облусундагы кабарчысы Кыял Сабирахунова техникалык колдоо көрсөткөн ОсОО “Фулл Голд Майнинг” компаниясынын Генералдык директору Луо Хуансуо мырзагы терең ыраазычылык билдирүү менен мындан ары да аталган алтын кенин казган ишкана менен тыгыз кызматташтыкта иш алып барыша тургандыгын өз сөзүндө баса белгилеп кетти.