АКШ Сенаты бейшембиде 98 добуш менен орусиялык жарандар менен компанияларга, Иран жана Түндүк Кореяга каршы багытталган санкциялар жөнүндөгү мыйзамды колдоду. Ага экөө каршы чыкты.

Мыйзам долбоору июлдун аягына чейин президент Трамптын кол коюусуна жөнөтүлөт.

Эгер президент кабыл алынган мыйзамды кийин өзгөртүүнү же жокко чыгарууну кааласа, Конгресстин уруксаты менен гана ишке ашыра алат. Мыйзам чыгаруучулар тышкы саясий маселелерде мынчалык ири ыйгарым укуктарды чанда гана алат.

Президент документке кол коебу же артка кайтарабы азырынча белгисиз. Анткен менен Конгресстин өкүлдөрүнүн басымы менен Трамп мыйзам долбооруна кол коет деп күтүлүүдө. Бул арада Акүйдүн маалымат бөлүмүнүн башчысы Антони Скарамуччи CNN телеканалына Трамп Конгресс менен Орусияга каршы дагы катаал санкцияларды киргизүүнү макулдашуу үчүн гана мыйзам долбооруна вето коюшу мүмкүн экенин билдирди.

Мыйзам долбооруна ылайык, Орусияга каршы киргизиле турган санкциялардын айрым жоболору энергетикалык секторго каршы багытталган. Тактап айтканда, америкалык ишканаларга орус компанияларына инвестиция жасоого тыюу салынат.