Өзбекстан Түркиядан брондолгон аскер унааларын сатып алууга ниеттенип жатат. Бул тууралуу өлкөнүн Коргоо министрлигинин маалымат кызматына таянып Podrobno.uz сайты жазды.

Тиешелүү келишим күн мурун Ташкентке келген Түркиянын коргоо министри Нуреттин Жаникли баштаган делегация менен сүйлөшүү маалында талкууланган.

«Өзбекстан Nurol компаниясынын EJDER 4х4 деген брондолгон унаасын алууну пландап жатат. Өзбек тарап аны быйыл июлда Өзбекстандын шартында сынап көргөн жана ага канааттанган. Азыркы тапта аталган аскер техникасынан онду сатып алуу жагы каралууда», – деп билдирди Коргоо министрлигин өкүлү.

Ал өзбек тарап мындан ары дагы Түркия менен аскердик-техникалык кызматташтыкты өнүктүрүүгө даяр экенин айтты. Бул үчүн учурда түрк тараптан инвестиция тартуу менен аталган техникаларды Өзбекстандын аймагында биргелешип өндүрүнүүнү жолго коюу маселеси талкууланууда.

Брондолгон EJDER 4х4 унаасы эки кишиден турган экипаж менен бирге сегиз десантты алып жүрө алат. Ага ар түрдүү курал-жарактарды да орнотууга болот.

Буга чейин АКШ армиясы Өзбекстанга кайтарымсыз негизде MRAP тибиндеги 308 брондолгон унаа берген.