Кыргыз Республикасынын Премьер-министри Сооронбай Жээнбеков 28-майда, үстүбүздөгү жылдын 27-майында сел кырсыгы орун алган Баткен облусунун Кадамжай районуна барды. Бул тууралуу КР Өкмөтүнүн Аппаратынын маалыматтык камсыздоо бөлүмү билдирди.

Алынган маалыматка караганда, райондогу абал, табийгат кырсыгынын кесепеттерин жоюу жана жабыркагандарга көмөк көрсөтүү боюнча кабыл алынган чаралар тууралуу Өзгөчө кырдаалдар министри Кубатбек Боронов маалымат берди.

Премьер-министр Сооронбай Жээнбеков жабыркаган объекттерди кыдырып чыгып, жергиликтүү тургундар менн жолугушту. Өкмөт башчы жаратылыш кырсыгынын натыйжасында курман болгондордун жакындарына жана туугандарына көңүл айтты. Ал белгилегендей, бардык тийиштүү мамлекеттик органдар тарабынан кырсык кесепеттерин кыска мөөнөттө жоюу боюнча активдүү иш жүрүүдө. Кырсыктан курман болгондордун үй-бүлөсүнө Кыргыз Республикасынын Өкмөтүнүн Резервдик фондунан материалдык көмөк көрсөтүлдү.

Окуя болгон жерге ошондой эле КР Транспорт жана коммуникациялар министри Замирбек Айдаров, Баткен облусундагы Өкмөттүн ыйгарым укуктуу өкүлү Жеңиш Разаков жана Кадамжай районунун мамлекеттик администрация башчысы – аким Акрам Мадумаровдор барган.