Кыйноолорго каршы бейөкмөт уюмдардын коалициясы өкмөттү абактардагы кыйноолорду жана өлүм фактыларын көз карандысыз жана эффективдүү иликтөөгө чакырууда. 26-июнь – Кыйноо курмандыктарын колдоонун эл аралык күнү.

Коалиция тараткан билдирүүдө бийликти 2011-жылы 21-декабрда Жанаөзөн окуялары учурунда убактылуу камоо жайында кыйноолордон улам көз жумган Базарбай Кенжебаевдин өлүмүнө тиешеси барларды жоопкерчиликке тартууга чакырды.

Жанаөзөнгө төрөтканадагы кызын көрүүгө келген Кенжебаевди күч түзүм кызматкерлери кармап кетип, абакка камашып, ал жерде аны катуу сабашкан.

Башкы прокуратуранын маалыматы боюнча, 2011-жылы 16-декабрда Жанаөзөн шаары жана Шетпе станциясындагы жаңжал учурунда 16 киши мерт болгон.

2012-жылы 28-майда Актау шаарынын соту Жанаөзөн окуясында кызмат абалынан аша чапты делген полициянын беш кызматкерин беш жылдан жети жылга чейин эркинен ажыраткан. Алардын баары мөөнөтүнөн мурда абактан чыгышкан.