Тажикстандын укук коргоо органдары Башкы прокуратуранын  жогорку даражадагы кызматкери Хуршед Жабборзоданы кармады. Маалыматтарга караганда, ал эки апта мурун Улуттук коопсуздук комитети менен коррупцияга каршы мекемеси тарабынан камалган.

Хуршед Жабборзода Башкы прокуратурада жарандык, экономикалык, үй-бүлөлүк жана административдик сот актыларынын мыйзамдуулугуна көзөмөл жүргүзүү башкармалыгынын башчысынын орун басары болгон.

“Азаттыктын” тажик кызматы кабарлагандай, Жабборзода эки жыл мурун Башкы прокуратурага Мамлекеттик каржы көзөмөлү жана коррупцияга каршы күрөшүү агенттигинен келген. Ал антикоррупциялык мекеменин буга чейин камалган кызматкерлеринин көрсөтмөсү менен кармалган. Хуршед Жабборзода документтерди жасалмалоого айыпталууда.

Учурда Мамлекеттик каржы көзөмөлү жана коррупцияга каршы күрөшүү агенттигинин мурдагы жана азыркы жети кызматкери камакта. Алардын иши менен атайын түзүлгөн иликтөө тобу алектенүүдө.