Бүгүн, 10-июнда Сузак районунун Топурак-Бел участкасында 2010-жылдын июнь айындагы Санпа окуясын эскерүү иш-чарасы болуп, ага КР Өкмөт башчысы Сооронбай Жээнбеков катышып, курман болгондордун үй-бүлөлөрүнө көңүл айтты.

Өкмөт башчы өз сөзүндө июнь окуясы өлкөнүн бүтүндүгүнө жана эгемендүүлүккө доо кетире турган жагдайды жаратканын баса белгиледи.

“Бийлик өз учурунда чара көрүп токтотуп калды. Кудай берген берекелүү жерибизде улутка бөлүнбөй, ата-бабадан бери келе жаткан мурасты сактап калалы. Элибизде тынчтык орноп, ынтымак болуп, мындан ары июнь каргашасы кайталанбасын”, - деди Жээнбеков.

Ал эми "Санпа шейиттери" коомунун төрагасы Сырдаш Мамарасулов өз сөзүндө 2010-жылдагы июнь окуясын уюштургандар жана ошол кездеги убактылуу өкмөттүн айрым мүчөлөрү жазаланышы керектигин айтты. Анын айтымында, кан төгүүгө жол берип, эки элди чабыштырган сепаратисттер жоопкерчиликке тартылышы керек.

Акырында эскерүүгө келгендер 2010-жылдын июнь каргашасында шейит кеткендердин арбагына багыштап куран окушуп, алардын жакындарына көңүл айтышты. Ошол июнь окуясында уулунун дайынын ушул кезге чейин таппай келе жаткан Марсиана Мамаева өкмөт башчыга кайрылып, жабырлануучуларды өзүнчө кабыл алуусун өтүндү.