Жалал-Абад шаарында гана эмес, жалпы облуста аялдар арасында бойдон алдыруулар саны улам барган сайын азайып баратат. Бул тууралуу облустук репрордукция борборунун жетекчиси, төрөт кызматынын координатору Айнура Давлетова билдирди.

Анын айтымында, акыркы жылдары медицина кызматкерлеринин эл арасында жүргүзгөн аракеттери аркылуу облус аймагында бойдон алдыруулар саны азайып бара жатат.

-Мисалы, 2015-жылы облус аймагында жалпысынан 1936 бойдон алдыруу учуру катталса, 2016-жылы анын саны 1666 болгон. Анын ичинен, 16-17 жаштагы кыздар арасындагы бойдон алдыруулар саны 2015-жылы 32ни түзсө, 2016-жылы 19ду түздү. Булардын ичинен биринчи жолу бойго бүткөндөрүнүн саны 2015-жылы 23 болсо, 2016-жылы 14 болду, - дейт ал.

Алынган маалыматтарга караганда, облуста бойдон алдыруу жагынан алдыда бараткандар 20-24 жаштагылар болуп саналат. Бул курактагылар арасында бойдон алдыруулар саны 2015-жылы 548 болсо, 2016-жылы 440 болду.

А.Давлетованын айтымында, мында негизинен медиктердин жүргүзгөн түшүндүрүү иштери жана контрацептивдерди пайдалануу боюнча калк арасындагы маалымдуулук роль ойногон. Бирок, эгер эл аралык донорлор калк арасында контрацептивдерди акысыз таркатууну колдоого алышпаса, абал кыйындап кетиши ыктымал.