Жогорку Кеңеш расмий күбөлүк ала элек жарандарга нике кыйгандарды кылмыш жоопкерчилигине тартуу демилгесин четке какты. Мындай чечим парламенттин жалпы жыйынында кабыл алынды. Мыйзам долбооруна 44 депутат "макул", 61 депутат "каршы" деп добуш берди.

Документ жашы жете элек өспүрүмдөрдүн укуктарын коргоого, билим алууга, саламаттыктарына кам көрүүгө жана түгөйүн өз каалоосу менен эркин тандоого багытталган. Мажбурлап нике кыйдырууга тыюу салган.

Үй-бүлө жана Кылмыш-жаза кодекстерине сунушталган өзгөртүүлөргө ылайык, жубайларды никеге чейин расмий каттоодон өтүүгө милдеттендирүү киргизилген. Ошондой эле нике күбөлүгү жок түгөйгө нике кыйган молдолорду жоопкерчиликке тартуу жагы каралган.

Статистикалык маалыматтарга караганда, Кыргызстанда аялдардын 15 пайызы 18 жашка, ал эми бир пайызы 15 жашка толо электе күйөөгө чыгат. Кыргызстан Евразия чөлкөмүндө турган 35 мамлекеттин арасында 15-19 жаштагы кыздардын турмушка чыгуусу боюнча жүргүзүлгөн изилдөөдө 5-орунда.